A terceira xornada das XVII Leccións Internacionais da USC puxo o foco en fenómenos tecnolóxico-xacobeos como a peregrinación na era dixital ou o proxecto Portomarín Virtual. O encontro celébrase no Museo das Peregrinacións de Compostela e no seu marco expertos analizan o Camiño de Santiago e o fenómeno Xacobeo.

Este mércores 22 de xullo celebrouse a presentación do OneHealth DataSpace, o espazo de datos multisectorial impulsado polo CESGA (Centro de Supercomputación de Galicia) para favorecer a colaboración entre organizacións dos ámbitos da saúde humana, animal e ambiental.

A Deputación de Pontevedra lanzou unha Oficina Tecnolóxica de Asistencia aos Concellos (OTAC) e deu novos avances cara unha administración máis áxil e transparente. Trátase dun espazo deseñado para liderar a transformación dixital dos 59 concellos da provincia. O seu obxectivo prioritario é garantir que as entidades locais dispoñan de persoal técnico especializado, infraestrutura TIC segura e servizos dixitais homoxéneos de calidade.

O conselleiro de Emprego, Comercio e Emigración, José González, anunciou que as 54 oficinas de emprego galegas contan xa con caixeiros autoservizo para facilitar os trámites de renovación ou recuperación da demanda de emprego. Na súa visita á oficina do Carballiño, destacou que o obxectivo é “contribuír a unha atención máis autónoma, áxil e eficiente e avanzar cara a un servizo máis eficaz, centrado no asesoramento personalizado e na adaptación ás necesidades reais do mercado laboral”.

Altia formalizou a adquisición do 100 % de Ednon, unha operación valorada en 9,85 millóns de euros, á que poderá sumarse un pagamento variable (earn out) de ata 2,795 millóns de euros condicionado ao cumprimento do plan de negocio da empresa durante os exercicios 2026 e 2027. A integración permitirá incorporar ao grupo os 140 profesionais de Ednon e ampliar as súas capacidades en ámbitos como a innovación, o goberno do dato, a ciberseguridade, as infraestruturas tecnolóxicas, os servizos xestionados e a integración de sistemas e comunicacións.

MasOrange puxo en marcha un dispositivo especial de monitorización da súa rede co obxectivo de garantir o servizo ante o previsible aumento de visitantes nas zonas desde as que poderá observarse o eclipse total de Sol do vindeiro 12 de agosto. Trátase do primeiro eclipse total visible desde España destas características en máis dun século, xa que o anterior produciuse en 1912.

O equipo galego do proxecto OpenPSM, enmarcado no grupo de investigación Novos Medios da Facultade de Ciencias da Comunicación da Universidade de Santiago de Compostela (USC), impulsa unha iniciativa Erasmus+ de Reforzo de Capacidades no Ensino Superior que está a desenvolver un novo mestrasdo (master) en Gobernanza Dixital que conecta a tecnoloxía, a democracia e a participación cidadá en toda Europa e a rexión do sur do Mediterráneo, en concreto nos países de Marrocos, Tunisia e Palestina.

Xa están dispoñíbeis en Udemy tres cursos en liña gratuítos sobre románico galego. Forman parte do proxecto Redescubre o Románico de Galicia, impulsado pola Fundación Santa María La Real, co apoio de Redeia e a Consellería de Cultura, Lingua e Xuventude da Xunta de Galicia. A acción formativa, en formato MOOC (curso online aberto e gratuíto), divídese en tres cursos que abordan cuestións como o románico compostelán e as peregrinacións, a Arte 1200 ou os mosteiros galegos.

A cita Raiola Marketing Conference (RMC) volve á Coruña o próximo 26 de setembro coa celebración da súa novena edición en PALEXCO. Organizado pola firma galega Raiola Networks, provedora de aloxamento e solucións IT, o evento reunirá a profesionais do mercadotecnia dixital nunha xornada de relatorios e mesas redondas centradas nas tendencias que marcan o presente do sector.

Apple sorprendeu presentando un avance de Nido de Villanas, unha microserie mexicana gravada integramente cun iPhone 17 Pro e publicada como parte da campaña Shot on iPhone. A produción xa está dispoñible na canle de YouTube da marca en forma de 14 episodios verticais curtos, duns dous minutos de duración cada un.

O Parlamento francés aprobou definitivamente a lei que prohibirá o acceso ás redes sociais aos menores de 15 anos. O texto recibiu o apoio de ambas as cámaras o 21 de xullo, despois de que deputados e senadores acordasen unha versión común da norma. O Goberno de Emmanuel Macron pretende que entre en vigor xa no inicio do próximo curso escolar, o 1 de setembro. A pesar da aprobación parlamentaria, a norma aínda podería ser recorrida ante o Consello Constitucional francés.

A rede social TikTok e o seu notábel crecemento internacional nos últimos anos está no alicerce dunha recente investigación do grupo Novos Medios da USC, que pon o foco no ámbito do xornalismo e na presenza cada vez maior de contidos periodísticos no seu seo (e tamén de profesionais). Medios e profesionais tiveron que adaptarse a este novo ecosistema dominado polo algoritmo “no que impera a velocidade, se desdebuxa a marca informativa, aparecen outros actores alternativos e prolifera a desinformación”, sinala a investigación.

Microsoft anunciou a segunda vaga de incorporacións de xullo e comezos de agosto ao catálogo de Xbox Game Pass, cunha selección de títulos que inclúe estreas desde o primeiro día, novas incorporacións para Game Pass Premium e o regreso dunha das campañas máis emblemáticas da historia de Halo.

Halliday deu a coñecer todos os detalles das súas novas lentes Gen 2, que apostan por unha pantalla monocroma con tecnoloxía de guía de ondas (waveguide) para proxectar información directamente no campo de visión do usuario. Chegará ao mercado en setembro a un prezo de 599 dólares e xa pode reservarse.

Google presentou unha nova xeración de modelos Gemini deseñados para reforzar o desenvolvemento de axentes de intelixencia artificial en produción, cun foco explícito na eficiencia de tokens, na redución de latencia e na fiabilidade. A compañía de Mountain View introduce Gemini 3.6 Flash, 3.5 Flash‑Lite e 3.5 Flash Cyber, tres propostas que buscan cubrir diferentes necesidades de desenvolvedores e empresas que operan con cargas de traballo complexas e de alto volume.

O SERGAS incorporou formalmente o seu primeiro robot con navegación cinemática, que xa está plenamente operativo, e que realizará en Santiago de Compostela cirurxía de columna de alta complexidade. Os detalles desta tecnoloxía foron compartidos no CHUS polo conselleiro de Sanidade, Antonio Caamaño, acompañado do xerente da área sanitaria de Santiago de Compostela e Barbanza, Ángel Facio.

O pleno do Consorcio da Zona Franca de Vigo aprobou este martes 21 de xullo os orzamentos para 2027. Fíxoo cun programa de investimentos para a área viguesa de máis de 123 millóns de euros, (123.528.444 euros), un 47,6% máis que en 2026, para seguir impulsando o desenvolvemento económico e a xeración de emprego. En canto á previsión plurianual a estimación de investimentos para o período 2027-2030 é a máis alta da historia do Consorcio, ascendendo a máis de 500 millóns de euros, cun incremento do 31,6% con respecto aos orzamentos do exercicio anterior.

Splatoon Raiders, o novo xogo de acción e disparos da franquía Splatoon, estará dispoñible en exclusiva para Nintendo Switch 2 a partir do 23 de xullo. Aínda que centrado na experiencia para un xogador, o xogo permite cooperar con ata catro participantes (a través da Internet ou mediante comunicación sen fíos local) para explorar illas, buscar tesouros e facer fronte a numerosas vagas de inimigos.

Sony Music Entertainment presentou unha segunda demanda por infracción de dereitos de autor contra a plataforma de xeración musical con intelixencia artificial Udio, na que acusa a empresa de copiar sen autorización 30.117 gravacións sonoras para adestrar os seus modelos de IA. A nova acción xudicial chega despois de que un xuíz federal rexeitase incorporar esas obras ao procedemento iniciado en 2024, aínda que recoñeceu expresamente que a discográfica podía reclamar por elas nun litixio independente.

O director da Axencia Galega das Industrias Culturais (AGADIC), Jacobo Sutil, visitou, no CIFP Universidade Laboral de Culleredo, o set onde se desenvolve a rodaxe da película Dímelo con besos, produción de Vaca Films para a plataforma de streaming de Amazon, Prime Video, e que conta co apoio de 300.000 euros por parte da Xunta de Galicia a través da convocatoria de 2026 do fondo para a atracción de rodaxes á nosa Comunidade.