Windows Phone parece confirmarse como unha alternativa máis sinxela a Android

Steve Ballmer compartiu cos asistentes ao BUILD 2013 reflexións sobre os moitos dispositivos aos que está a achegarse o Windows de Microsoft

Durante o encontro para desenvolvedores BUILD organizado por Microsoft, aparte de presentarse a versión preliminar de Windows 8.1, tamén quíxose pór en valor a súa contrapartida móbil, Windows Phone 8, sobre o que a compañía de Redmond desvelou algunhas informacións interesantes como que o 42% dos usuarios que adquiren un móbil con Windows Phone veñen dun terminal básico, dando a impresión de que o sistema operativo móbil de Microsoft capta usuarios grazas á súa interface máis sinxela, facilitando a transición ao mundo dos smartphones; pero a tal dato tamén engadiron que os 23% dos móbiles con Windows Phone corresponderon a usuarios que viñan de Android, dando a impresión de que atoparon un espazo moi cómodo como alternativa ao iPhone sen a complexidade que moitos atribúen a Android.
De todos os xeitos, dende Microsoft non esquecen que actualmente hai 4.000 millóns de usuarios de móbiles básicos en todo o mundo, polo que o sector dos smartphones aínda ten moito potencial que explotar. Vemos así que terminais como o Nokia Lumia 520 e outros dispositivos con Windows Phone, que chegan ao mercado a prezos axustados e cun comportamento máis que satisfactorio, poidan conseguir unha boa presenza comercial nos vindeiros meses.