WhatsApp permite reaccionar a mensaxes con calquera emoticona

Hai un par de meses WhatsApp incorporou as reaccións como un xeito de dinamizar as respostas mediante un mecanismo que consegue respostas máis rápidas e divertidas e, especialmente, reduce a cantidade de ruído nos grupos, pero esta forma de comunicarse de xeito minimalista vén de renovarse de xeito que xa non limita as reaccións a un reducido grupo de emoticonas, senón que deixa que os usuarios elixa a emoticona que desexen como reacción.
Agora, cando queremos reaccionar a unha mensaxe, aparte das emoticonas predeterminadas, atoparmos un símbolo de + que, ao premelo, permítenos elixir todas as emoticonas dispoñibles en WhatsApp.
A nova funcionalidade iniciou hoxe o seu espallamento, polo que algúns usuarios aínda poderían tardar algúns días en recibila, pero semella que a meirande parte dos usuarios xa contan coas reaccións ampliadas, o que axudará a comunicacións máis fluídas e con menos mensaxes innecesarias nas conversas.