Telefónica informa en Vigo dun programa de bolsas para novos titulados en enxeñarías tecnolóxicas

Telefónica quer impulsar o talento dos mozos universitarios co programa Talentum, que no caso dos universitarios concrétase nun programa de bolsas de longa duración que constitúe unha oportunidade para a aproximación dos novos titulados á realidade empresarial fomentando a súa integración no mercado laboral a través da formación práctica, iniciativa que vén de darse a coñecer entre os enxeñeiros vigueses da man de Javier Zorrilla, director do Territorio Norte de Telefónica España.
Zorrilla destacou que a convocatoria deste tipo de bolsas é unha mostra do compromiso de Telefónica coa “captación de talento para seguir innovando e crecendo na era dunha revolución dixital que as novas xeracións están chamadas a comandar”.
Os enxeñeiros en Telecomunicación, Industria e Informática que se beneficien dalgunha das 500 bolsas do programa poderán ter a posibilidade de incorporarse á multinacional española (que en edicións anteriores asumiu ao 95% dos bolseiros que completaron a súa estadía formativa de 12 meses).