SecondRotation.com compra produtos electrónicos para revendelos a través da Internet

A venda de produtos electrónicos de segunda man a través da Internet é algo moi habitual, pero precisa estar pendente de poxas e distintos trámites que poden resultar pouco seguros e moi traballosos para os interesados en desfacerse dos seus chismes vellos, polo que nos EE.UU. lanzaron unha curiosa web que se dedica a mercar dispositivos electrónicos dun xeito moi doado para o vendedor.
Dende SecondRotation.com os usuarios poden buscar o produto que queren vender e marcar o seu estado de conservación e outras características para recibir unha valoración do mesmo e, de estar conforme, pode remitilo por correo á empresa da web, que tras revisar que se cumpren as características indicadas polo vendedor, remiten un cheque coa cantidade acordada.
Os responsables da web venden logo os produtos mercados en plataformas como eBay, preocupándose eles de atopar comprador, aínda que para moitos tamén pode ser interesante o seu servizo para comprobar o prezo mínimo ó que se poden mercar certos trebellos usados. Así, podemos ver como un iPod nano se valora por pouco máis de 20 dólares, mentres que un iPhone supera os 600 dólares.