Samsung e Apple dominan as vendas de smartphones no 3º trimestre de 2012

Gartner publicou hoxe datos sobre o mercado de dispositivos móbiles a nivel mundial relativos ao terceiro trimestre do ano, reflectindo que aínda que o número de dispositivos tivo unha caída interanual do 3,1%, ao centrarnos nos smartphones teriamos que medraron un 46,9% interanual, demostrando a alta demanda deste tipo de dispositivos, aínda que non todos os seus fabricantes poidan gozar desta fortaleza.
Os datos publicados dan conta do feito de que o mercado dos smartphones está dominado por 2 fabricantes, Apple e Samsung, que controlan o 46,5% das vendas, mentres que o resto de fabricantes loitan por facerse cunha terceira posición aínda bastante afastada.
No trimestre anterior parecía que Nokia estaba a facerse co desexado terceiro posto na venda de smartphones, pero o anuncio de que a súa familia Lumia non podería actualizarse a Windows Phone 8 levouno a caer ata unha sétima posición (aínda que o lanzamento dos Lumia 920 e 820 poderían facerlle recuperar a súa posición no trimestre actual), de xeito que RIM puido volver a quedar nun terceiro posto, seguido por HTC, compañía que está a ter moitos problemas para continuar en posicións relevantes no sector.
Aínda que a campaña de Nadal dinamiza habitualmente as vendas, dende Gartner queren ser prudentes, e pensan que o pulo vai ser menor que en exercicios anteriores (tendencia que parece estar producida pola conxuntura económica global). Tamén estiman que Samsung continuará a súa tendencia crecente, que no pasado trimestre levounos a vender preto de 98 millóns de móbiles, quintuplicando as vendas de Apple e superando finalmente a Nokia (que padeceu unha importante caída). Confírmase así que a aposta de Samsung pola súa familia de móbiles Galaxy foi todo un acerto, pois pasou dunha situación na que no primeiro trimestre de 2010 só o 3% dos seus móbiles vendidos eran smartphones a que agora o sexan o 54%, o que contribuíu considerablemente a incrementar os beneficios da compañía surcoreana, que hoxe incluso estaría a facer máis cartos cos seus Galaxy que Google con Android. Sorprende ver que Samsung e Apple sexan practicamente os únicos fabricantes de móbiles aos que lles vai ben no que a marxes operativos se refire, superando o 20%, mentres que LG, Nokia, Sony e RIM estarían a pasar por unha mala racha da que HTC sálvase por moi pouco.
Se miramos aos sistemas operativos temos que Android superou os 122 millóns de dispositivos no terceiro trimestre de 2012, o que supón un incremento interanual do 102%, mentres que Apple tivo que conformarse con máis de 23 millóns de dispositivos e RIM con preto de 9 millóns (cunha caída interanual de preto do 30%).