RetroCoruña convoca aos seareiros da informática clásica a xuntarse en Sada

Non só Compostweets adiou este ano a súa celebración ata o mes de decembro, senón que RetroCoruña tamén fai o mesmo, e mañá celebrará no Pavillón Municipal de Sada a súa 6ª edición entre as 11:00 e as 21:00 horas, de xeito que os amantes dos videoxogos e a informática clásica poderán xuntarse para ver unha completa exposición, asistir a un relatorio, ver unha proxección, participar en torneos de videoxogos e incluso mercar produtos relacionados con este mundo.
Como vén a ser habitual, o encontro contará cunha completa selección de equipos en exposición, así como numerosos postos nos que poder botar unha partida libremente, entre os que destaca este ao unha Zona PC na que poder lembrar videoxogos clásicos para ordenadores persoais (como as aventuras de Lucasfilm). Como o evento celebra os 30 anos do Macintosh, ás 18:00 horas acollerá un relatorio de Antonio Rodríguez (AUIC) no que fai unha achega aos comezos da compañía da mazá, mentres que outros nostálxicos poderán descubrir o telefilme documental MicroMen de 2009, que narra a rivalidade entre Sinclair e Acorn Computers nos anos 80 e proxectarase ás 13:15 horas.
Este encontro organizado pola Asociación de Usuarios de Informática Clásica (AUIC) contará con numerosos expositores (Clone Computers, JoJo073, HTDreams, Movemento Xove, Caramel Cute Shop, Comundad Ociorum, Hipsilon, MeGustaLoRetro, Web8Bits, Akkad Studios, AUIC, Legión Gamer e SoloBits), animarase con torneos de videoxogos de Tetris (12:00 horas), Ghost & Goblins (17:00 horas) e Shilped (19:15 horas), competicións organizadas por Legión Gamer, e incluso sorteos que tomarán como referencia o número de entrada (que é de balde).