Remata o desenvolvemento de Windows 8.1

Microsoft ten prevista a estrea oficial de Windows 8.1 para o día 17 de outubro, pero hoxe mesmo xa anuncia que a actualización de balde que chegará para Windows 8 está xa rematada e comeza a enviarse aos fabricantes de hardware para que poidan comezar a integración de Windows 8.1 e Windows RT 8.1, para que en outubro poidan colocar os novos equipos nas tendas cun sistema operativo actualizado, o que provocou tamén as inevitables filtracións destas versións (xa están a circular pola Rede copias da versión en chinés simplificado).
Cómpre destacar que, aínda que xa podemos considerar definitiva a versión de Windows 8.1, ao quedar varias semanas para o seu lanzamento efectivo, é habitual que se incorporen no camiño algunhas pequenas melloras e correccións, polo que intentar adiantarse a instalar as versións filtradas non é moi recomendable.
Con Windows 8.1 Microsoft intenta evitar o rexeitamento inicial que amosaron moitos usuarios a Windows 8, abrindo o sistema a un público máis amplo con detalles como a recuperación do botón de Inicio ou a posibilidade de iniciar o equipo directamente no Escritorio (sen pasar polo menú de Inicio). A interface de uso tamén é máis homoxénea, melloráronse numerosos detalles relativos ao uso do equipo tanto en mobilidade como na empresa e incluso incorporouse o soporte nativo de impresoras 3D. Tamén mellora o navegador web incorporado e inclúese Skype dentro do propio sistema.