PayPal non protexerá os pagamentos para campañas de crowdfunding

Nos últimos meses non están a ser poucos os proxectos de micromecenado que fracasan, non só á hora de cumprir prazos e expectativas, senón que chegan a non ser quen de facer realidade o produto prometido, deixando aos mecenas sen os cartos achegados e sen a súa correspondente recompensa, risco que debería quedar claro dende o primeiro momento, e que non parecen saber entender moitos usuarios (as plataformas como Kickstarter ou Verkami non son tendas en liña) e por iso PayPal anunciou emendas nas súas normas de uso, que entrarán en vigor o 25 de xuño, e nas que se recolle como na sección 13.3, na categoría de produtos que non poden ampararse na popular protección de compras que ofrece este sistema de pagamentos incorpóranse as plataformas de micromecenado, as compras a axencias gobernamentais e as apostas.
Con este tipo de precaucións dende PayPal non buscan danar de ningún xeito as campañas de micromecenado, ás que aseguran seguir apoiando, senón que deixan constancia do feito de que non poden asegurar os pagamentos en operacións que carecen de ningún tipo de garantía.
Lembremos que PayPal tampouco permite gozar da protección de pagamentos para a compra de tarxetas de pre-pagamento, o uso de terminais virtuais, os pagamentos persoais ou incluso a adquisición de vehículos e inmobles, aínda que lembran que a ausencia da garantía das operacións non impide a presentación de disputas para tentar chegar a un acordo co vendedor en caso de conflito.