Os xogos de LEGO Star Wars chegan a iOS

A adaptación de películas de cine ao videoxogo dándolle forma de figuras de LEGO conseguiu grande éxito nos últimos anos, a unha das franquías máis beneficiadas foi a de Star Wars, que agora pode gozarse en pleno en dispositivos con iOS grazas á chegada á App Store de LEGO Star Wars: The Complete Saga, que recolle nunha única aplicación as dúas triloxías galácticas de George Lucas, achegando o Episodio I de balde e permitindo adquirir o resto de entregas de xeito independente ou por lotes, de xeito que o xogo completo tería un prezo de 13,99 euros, o que é considerablemente máis barato que cando este título chegou ás consolas de videoxogos domésticas.
Estamos ante un xogo moi completo que, de feito, para instalarse nun iPhone ou iPad precisa de que o dispositivo teña 1,44 Gb de espazo libre (agás se facemos a instalación a través dun ordenador, caso no que chegaría con ter 735 Mbytes libres). Ofrece 36 niveis no seu modo historia, xunto con outros contidos adicionais, presenta a máis de 120 personaxes (entre os que non faltan Luke Skywalker, Darth Vader, Han Solo...), poderanse empregar os poderes da Forza cando encarnemos a un cabaleiro Jedi, funciona coa mecánica propia dos xogos de LEGO e permite empregase con controis clásicos ou facendo un uso máis directo da pantalla táctil (segundo as preferencias do usuario).