O galego reduce á metade a súa presenza na Rede

Gráfica na que se aprecia o descenso no uso do galego

O pasado sábado celebrábase o Día das Letras Galegas, adicado desta volta ao poeta Xosé Mª Díaz Castro, o mesmo 17 de maio festexábase tamén o Día Mundial de Internet. Aproveitando a coincidencia, dende w3techs.com analizouse a relación existente entre diferentes linguas e a Rede, incluída a nosa. Dito doutro xeito: analizouse a permanencia do galego en Internet. A casualidade fai que reparemos na existencia da nosa lingua dentro e fóra das pantallas do computador. Neste caso que nos ocupa, centrámonos na realidade que ocupa o galego como idioma empregado na Rede, pois como se avanzaba dende CienciaGalega o panorama non é nada positivo no último ano, a porcentaxe do uso do galego viuse reducido á metade: do 0,015% do total de contidos web no mundo a apenas un 0,0075%.
Os datos actuais sitúan ao galego moi lonxe dos idiomas que superan o 0,1% dos contidos en liña e que marca a fronteira entre as linguas consideradas relevantes na Rede e as minoritarias. Arestora a lingua galega sitúase no posto 48 na clasificación mundial, con porcentaxes semellantes ao saami setentrional (idioma que se fala en rexións do norte de Noruega, Finlandia e Suecia) e colócase inmediatamente despois do albanés e do mongol, segundo os datos estimativos de w3techs.com, que analiza a diario arredor de 10 millóns de páxinas web de todo o mundo.
A subliñar son os sitios web máis senlleiros nos que se emprega o galego: Facebook.com, Wikipedia.org, WordPress.com, Bing.com, Google.es, Wiktionary.org, Wikibooks.org, Lavozdegalicia.es, Tuenti.com e Wikisource.org.
Na banda oposta á situación que vive o galego atópase o inglés, a lingua dominante en máis da metade dos sitios web, seguida xa moi de lonxe polo alemán, o ruso e o xaponés. O español, malia que segue medrando en Internet, ocupa o sexto posto cun 4,6%, e o portugués, co 2,3%, é o oitavo idioma máis usado, segundo os recentes datos achegados por w3techs.com.
De compararmos a porcentaxe do uso do galego cos datos das outras linguas cooficiais do Estado, obsérvase que a publicación en català é 8,6 veces maior, mentres que respecto ao euskara, a presenza do galego é 1,6 veces maior.
Mención á parte merece a produción das enciclopedias en liña libres, políglotas e editadas de xeito colaborativo -as chamadas Wikipedias- o galego, que conta coa súa Galipedia, sitúase no posto 47 na clasificación de artigos publicados por idioma, con 112.887 textos editados, é dicir, o 0,358% do total de publicacións nas Wikipedias de todo o mundo. Na produción de artigos na Wikipedia, o galego colócase despois do noruegués (113.77 artigos) e por diante do inglés sinxelo (112.587), idioma este último controlado e artificial baseado na simplificación do vocabulario e gramática da lingua natural. A publicación en galego mantense moi lonxe da produción en català (427.980 artigos) e está tamén por debaixo do euskara (180.390).
En canto á rede social Twitter, a compañía GNIP -de Colorado (Estados Unidos)- vén de elaborar un mapa interactivo con datos extraídos de Twitter para xeorreferenciar chíos publicados por usuarios de todo o mundo nas distintas linguas empregadas nesta rede. De novo, o inglés é a lingua dominante. No caso do galego, obsérvase que o seu uso entre os usuarios de Twitter é significativamente inferior ao do castelán.