O cargador común para móbiles xa ten data na Unión Europa

A actualización da directiva europea que regula os requisitos dos equipos electrónicos de cara á súa carga, buscando a interoperabilidade como vía para simplificar o seu uso e reducir os refugallos, xa é oficial, de xeito que xa temos datas para a obrigatoriedade de que smartphones, consolas portátiles e moitos outros trebellos de tamaño reducido empreguen o conector USB-C para cargar a súa batería interna.
Concretamente a data límite para a adopción do sistema de carga harmonizado será o 28 de decembro de 2024, ou sexa, que antes do 28 de decembro de 2023 os diferentes estados da Unión Europea deberán incorporar ás súas lexislacións correspondentes as medidas indicadas na directiva comunitaria.
Cómpre salientar que o regulamento non afecta aos dispositivos que se carguen unicamente sen fíos, e no caso dos ordenadores portátiles a harmonización dos cargadores non sería obrigatoria ata o 28 de abril de 2026.
Confíase que este medida leve a que Apple introduza o conector USB-C nos iPhone no outono do ano que vén, sendo un dos poucos produtos de electrónica de consumo que aínda non adoptou tal medida, xa que incluso as tabletas e ordenadores da compañía da mazá aceptan carga por USB-C.