Lithium Technologies podería mercar Klout por 100 millóns de dólares

Para medir a relevancia persoal e profesional na Rede nos últimos tempos conseguiu destacar o cuantificador Klout, que colle información de Twitter, Facebook, Foursquare, Instagram, Google+ e LinkedIn para convertela nunha puntuación numérica entre 1 e 100, directamente proporcional co tamaño da rede social tecida e que incluso serve para recibir recompensas (produtos de mostra, invitacións a eventos, descontos...) en función da nosa influencia, especialmente nos EE.UU., e parece que a propia compañía detrás deste medidor de popularidade tamén resulta relevante, pois coméntase que está a piques de pecharse a súa compra por parte de Lithium Technologies por un mínimo de 100 millóns de dólares.
O negocio de Klout está enfocado na análise da influencia en redes sociais, para o que teñen que facer axustes constantemente no seu algoritmo para manter a súa plataforma o máis rigorosa posible, aínda que no seu modelo de negocio tamén entran as promocións das recompensas (que buscan que os beneficiarios publiquen nas súas redes sociais sobre os produtos e marcas promocionados) e incluso o licenciar os seus datos a outras compañías.