Facebook estréase no NASDAQ

Facebook anunciou onte que ían colocar no mercado bolsista 421.233.615 accións da súa empresa a un valor de saída de 38 dólares (29,85 euros), agardando pechar esta oferta pública o vindeiro martes, e hoxe escenificouse esta estrea co creador de Facebook, Mark Zuckerberg, tocando a campá de apertura do NASDAQ dende a sede da súa compañía en Menlo Park (en vez de trasladarse ao edificio da Bolsa en New York). Deste xeito comezou a oferta pública de venda (OPV) de Facebook, colocando no mercado 16.000 millóns de dólares en participacións da empresa que estaría valorada en 104.000 millóns de dólares, no que sería a terceira OPV máis importante dos EE.UU.
A oferta inicial de Facebook parece estar a funcionar bastante ben, e no momento de escribir estas liñas a cotización das accións de Facebook superan un 8,34% o seu prezo de saída (nalgún momento incluso superaron un incremento do 10% do prezo), dando a entender que o mercado confía na boa saúde da plataforma que actualmente ten máis de 900 millóns de usuarios (dos que máis de 17,5 estaría en España).
Estamos un momento histórico que certifica a traxectoria meteórica de Facebook, compañía creada en 2004, e que actualmente ten uns 3.539 traballadores, polo que a súa impresionante valoración bolsista resulta difícil de crer, e agora deberá demostrar se a confianza depositada sobre a mesma está xustificada.
ACTUALIZACIÓN: Finalmente Facebook rematou a xornada cunha subida das súas accións de só un 0,61%, o que podería indicar que a súa valoración inicial era bastante atinada (pese a que a meirande parte dos expertos aseguran que a compañía está sobrevalorada).