Desaparece a canle televisiva Movistar Disney

Cando se falaba do espallamento internacional de Disney+ comentábase que no caso español podería adiarse esta plataforma de vídeo baixo demanda por existir a canle Movistar Disney, segunda canle de televisión de pagmaento do mundo tras Sky Movies Disney en Reino Unido, que ofrece as 24 horas contidos de Disney entre os que non faltan grandes éxitos cinematográficos como Frozen, El Rey León ou os filmes de Piratas del Caribe. Pero como ben sabemos, o 24 de marzo chegará a España Disney+, e unha das consecuencias diso pillou a moitos por sorpresa: a partires do día 24 a canle Movistar Disney cambará do dial 32 ao dial 101, para cesar as súas emisións o día 31 (aínda que os contidos permanecerán dispoñibles ata o 7 de abril grazas ao servizo Últimos 7 Días).
Falamos dunha baixa dunha canle de televisión de pagamento que non será compensada por outra canle equivalente, aínda que o feito de que Movistar accedese á cancelación da canle cando supostamente quedaban varios meses de contrato en vigor podería indicar acordos entre as partes para facilitar a contratación de Disney+ dende Movistar, como tamén acontece con outras plataformas over-the-top.