AliExpress celebra a súa grande xornada de rebaixas esta fin de semana

España é un dos poucos países nos que AliExpress emprende accións locais, de xeito que non só celebramos o Día do Solteiro os 11 de novembro (11.11), senón que tamén temos ofertas exclusivas para o noso territorio, facilitando así cunha maior oferta e flexibilidade ao realizar compras neste mercado en liña durante a vindeira fin de semana.
Precisamente este ano o 11.11 cadrou en domingo, o que fixo que tivesen que organizar dun xeito un tanto diferente a súa celebración, que comezará o sábado ás 14:00 horas e manterase durante 48 horas. Esperan recibir infinidade de pedidos de todo o mundo, superando amplamente a facturación que teñen as tendas en liña occidentais no Black Friday, e aínda que podemos acceder a todas estas promocións globais, cómpre salientar que se realizamos pedidos a AliExpress Plaza en España podemos adquirir produtos oficiais de primeiras marcas con servizo postvenda en España, con entrega de balde en 3 días con envío dende España (de xeito que non só os envíos son rápidos, senón que tampouco teñen problemas nas alfándegas) e tamén permiten gozar de 15 días de dereito de desestimento e 2 anos de garantía.
Loxicamente os produtos que se adquiren a través deste apartado español de AliExpress ten prezos menos atractivos que os produtos que chegan dende China, polo que é decisión do consumidor se opta pola compra local ou pola importación (e os seus riscos e demoras).
Aínda que as ofertas de AliExpress afectan a produtos moi variados, teñen especial éxito nestas xornadas promocionais os produtos tecnolóxicos, ante o atractivo de facerse con smartphones como o Pocophone F1 a 279 euros, dun Honor 8X con 4 GB de RAM e 128 GB de almacenamento por menos de 207 euros ou dos célebres patinetes eléctricos de Xiaomi por 339 euros.
Tamén cómpre lembrar que este tipo de campañas teñen ofertas que duran as 48 horas (ou ata que esgoten existencias) á vez que tamén realizan ofertas lóstrego, co que buscan que os consumidores estean moito tempo pendentes da tenda en liña, fomentando así o seu consumo impulsivo.